देशभर वर्षाको सम्भावना, केही स्थानमा भारी वर्षा र हिमाली क्षेत्रमा हिमपात हुनसक्ने

काठमाडौँ, २३ असार । जल तथा मौसम विज्ञान विभागले आजदेखि आगामी तीन दिनसम्म देशका विभिन्न स्थानमा वर्षाको सम्भावना रहेको जनाएको छ। केही क्षेत्रमा भारी वर्षा, मेघगर्जन–चट्याङ तथा हिमाली क्षेत्रमा हिमपात हुन सक्ने भएकाले सतर्कता अपनाउन आग्रह गरिएको छ।

मौसम पूर्वानुमान महाशाखाका अनुसार हाल देशभर सामान्यदेखि पूर्ण बदली रहेको छ। कोशी, बागमती, लुम्बिनी र कर्णाली प्रदेशका केही स्थान तथा गण्डकी र सुदूरपश्चिम प्रदेशका एक–दुई स्थानमा मध्यम वर्षा भइरहेको छ।

महाशाखाका अनुसार आज राति देशका हिमाली क्षेत्रका केही स्थानमा मेघगर्जन–चट्याङसहित मध्यम वर्षा र हिमपातको सम्भावना छ। साथै कोशी प्रदेशका पहाडी तथा तराई क्षेत्रका केही स्थान र मधेस, बागमती, गण्डकी, लुम्बिनी तथा सुदूरपश्चिम प्रदेशका एक–दुई स्थानमा भारी वर्षा हुन सक्ने अनुमान गरिएको छ।

भोलि बुधबार र पर्सी बिहीबार पनि देशभर सामान्यदेखि पूर्ण बदली रहनेछ। बुधबार पहाडी क्षेत्रका एक–दुई स्थानमा भारी वर्षाको सम्भावना रहेको छ। मधेस, लुम्बिनी र सुदूरपश्चिम प्रदेशका तराईका केही स्थानमा हावाहुरी चल्न सक्ने महाशाखाले जनाएको छ।

पर्सी बिहीबार कोशी, लुम्बिनी र सुदूरपश्चिम प्रदेशका तराईका केही स्थान तथा मधेस, बागमती र गण्डकी प्रदेशका तराईका एक–दुई स्थानमा मेघगर्जन–चट्याङसहित मध्यम वर्षा हुने सम्भावना छ।

त्यस्तै, कोशी, बागमती, गण्डकी र सुदूरपश्चिम प्रदेशका पहाडी तथा तराई क्षेत्रका एक–दुई स्थानमा भारी वर्षा हुन सक्ने भएकाले नदी, खोला तथा पहिरो प्रभावित क्षेत्रमा विशेष सतर्कता अपनाउन महाशाखाले आग्रह गरेको छ।