डोनाल्ड ट्रम्पका सहयोगीको निधन

२९ असार, काठमाडौं । अमेरिकी राष्ट्रपति डोनाल्ड ट्रम्पका निकट सहयोगी तथा रिपब्लिकन सिनेटर लिन्ड्से ग्राहमको ७१ वर्षको उमेरमा निधन भएको छ ।

उनको कार्यालयका अनुसार शनिबार साँझ छोटो र आकस्मिक बिरामीपछि उनको मृत्यु भएको हो । उनका प्रवक्ताका अनुसार प्रारम्भिक चिकित्सकीय परीक्षणले मुटुसँग जोडिएको मुख्य धमनी (एओर्टा) च्यातिएकाले उनको मृत्यु भएको देखाएको छ ।

सन् २००२ मा अमेरिकी सिनेटमा निर्वाचित दक्षिण क्यारोलिनाका ग्राहम अमेरिकी विदेश नीतिका सबैभन्दा प्रभावशाली नेतामध्ये एक मानिन्थे । उनी विदेशमा अमेरिकी सैन्य हस्तक्षेपको वकालत गर्ने नेताका रूपमा परिचित थिए ।

राष्ट्रपति डोनाल्ड ट्रम्पले ग्राहमलाई ‘साँचो अमेरिकी देशभक्त’ भन्दै उनको अभाव गहिरो रूपमा महसुस हुने बताएका छन् ।

मृत्युअघि ग्राहम युक्रेनको राजधानी किएभको भ्रमणमा थिए । उनले शुक्रबार युक्रेनी राष्ट्रपति भोलोदिमिर जेलेन्स्कीसँग भेटेका थिए । भ्रमणअघि उनीमा कुनै स्वास्थ्य समस्या देखिएको थिएन ।

ट्रम्पले एनबीसी न्युजसँग कुरा गर्दै मृत्यु हुनुभन्दा केही घण्टाअघि आफूले ग्राहमसँग कुरा गरेको बताए । उनका अनुसार त्यसबेला ग्राहम ठीकै सुनिन्थे, यद्यपि केही थकित देखिन्थे ।’

ट्रम्पले भने, ‘उनी धेरै हिसाबले निकै दृढ स्वभावका व्यक्ति थिए । आफू सही छु भन्ने लागेपछि विरोधका बाबजुद पनि पछि हट्दैनथे । तर उनी असल व्यक्ति थिए ।’