शनिबार र आइतबार भारी वर्षाको सम्भावना, सतर्क रहन मौसम विभागको आग्रह

काठमाडौँ, २ साउन। जल तथा मौसम विज्ञान विभागअन्तर्गतको मौसम पूर्वानुमान महाशाखाले शनिबार र आइतबार देशका विभिन्न क्षेत्रमा भारीदेखि धेरै भारी वर्षाको सम्भावना रहेको भन्दै सतर्कता अपनाउन आग्रह गरेको छ।

महाशाखाका अनुसार हाल देशभर आंशिकदेखि सामान्य बदली रहेको छ। कोशी, बागमती, गण्डकी र लुम्बिनी प्रदेशका केही स्थान तथा कर्णाली प्रदेशका एक-दुई स्थानमा हल्कादेखि मध्यम वर्षा भइरहेको छ।

आज राति देशका पहाडी भूभागका थोरै स्थानमा तथा कोशी, लुम्बिनी र सुदूरपश्चिम प्रदेशका तराई क्षेत्रका केही स्थानमा भारीदेखि धेरै भारी वर्षा हुने सम्भावना रहेको महाशाखाले जनाएको छ। साथै मधेस, बागमती र गण्डकी प्रदेशका तराईका एक-दुई स्थानमा पनि भारी वर्षा हुन सक्ने अनुमान गरिएको छ।

महाशाखाका अनुसार कोशी, बागमती, गण्डकी, लुम्बिनी र सुदूरपश्चिम प्रदेशका पहाडी तथा तराई क्षेत्रका केही स्थानमा अति भारी वर्षाको समेत सम्भावना रहेको छ।

भोलि आइतबार पनि मौसममा उल्लेख्य सुधार नआउने जनाइएको छ। कोशी, लुम्बिनी र सुदूरपश्चिम प्रदेशका पहाडी तथा तराई भूभागका थोरै स्थानमा तथा बागमती र गण्डकी प्रदेशका केही स्थानमा भारीदेखि धेरै भारी वर्षा हुन सक्ने पूर्वानुमान गरिएको छ। मधेस, बागमती र गण्डकी प्रदेशका तराईका एक-दुई स्थानमा समेत भारी वर्षाको सम्भावना रहेको छ।

त्यसैगरी, कोशी, गण्डकी, लुम्बिनी र सुदूरपश्चिम प्रदेशका पहाडी तथा तराई क्षेत्रका केही स्थानमा अति भारी वर्षा हुन सक्ने भएकाले विशेष सावधानी अपनाउन महाशाखाले आग्रह गरेको छ।

सोमबार पनि सुदूरपश्चिम प्रदेशका पहाडी तथा तराई क्षेत्रका थोरै स्थानमा तथा बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भूभागका एक-दुई स्थानमा भारी वर्षाको सम्भावना रहेको जनाइएको छ।

मौसमविद्हरूले लगातारको वर्षासँगै बाढी, पहिरो, डुबान तथा नदी-नालामा पानीको सतह बढ्न सक्ने भएकाले सतर्क रहन, आवश्यक परे सुरक्षित स्थानमा बस्न तथा मौसमसम्बन्धी आधिकारिक सूचनाहरू नियमित रूपमा पछ्याउन सर्वसाधारणलाई अनुरोध गरेका छन्।