काठमाडौं, भदौ २७
सर्वोच्च अदालतले डीआईजी नवराज सिलवालले कार्यसम्पादनका आधारमा नेपाल प्रहरीको महानिरीक्षक (आईजीपी) नियुक्ति गर्नुपर्ने माग गर्दे सर्वोच्च अदालतमा दायर गरेको रिट सर्वोच्च अदालतले खारेज गरेको छ ।

डिआइजी नवराज सिलवालले आफूलाई प्रहरी महानिरीक्षक बनाउन दायर गरेको रिट सर्वोच्च अदालतको बृहद् पूर्ण इजलासले आज खारेज गरेको हो ।

यो सँगै सरकारको प्रकाश अर्याललाई आइजी बनाउने निर्णय सदर भएको छ । आजको फैसलामा अर्यालको कार्यसम्पादन मूल्याङ्कन नम्बर ५४.२ रहेको उल्लेख छ भने सिलवालको ५२.४ मात्र छ।

प्रधानन्यायाधीश गोपाल पराजुलीसहित ७ सदस्यीय बृहत् पूर्ण इजलासमा मुद्दाको सुनुवाइ भएको थियो। पराजुलीसहित न्यायाधीशहरु ओमप्रकाश मिश्र, केदारप्रसाद चालिसे, शारदा प्रसाद घिमिरे, मीरा खड्का, प्रकाशमान सिंह राउत र पुरुषोत्तम भण्डारी बृहत् पूर्ण इजलासमा सदस्य थिए।

सरकारले गत चैत २८ गते प्रहरी महानिरीक्षकमा प्रकाश अर्याललाई नियुक्ति गरेको थियो ।

प्रकाशित मिति: २७ भाद्र २०७४, मंगलबार