भरतपुर प्रकरण दोहोरिन सक्ने खतरा, बुथ कब्जा प्रमुख चुनौती
![](https://www.deshkonews.com/wp-content/uploads/2017/09/local-election.jpg)
काठमाडौं, भदौ ३१
पहिलो चरणको निर्वाचन अन्तर्गत भरतपुर महानगरपालिका वडा नम्बर १९ मा माओबादी केन्द्रका कार्यकर्ताले मतगणनाका क्रममा मतपत्र च्यातेपछि मतगणना नै स्थगित भयो । पछि सर्बोच्च अदालतले सो ठाउँमा पुनः मतदान गर्न आदेश दियो ।
निकै प्रतिस्पर्धा भएको भरतपुरमा एमालेको तर्फका मेयरका उम्मेदवार देवी ज्ञवालीले अग्रता कायम गरेका थिए । माओबादी केन्द्रकी उम्मेदवार रेणु दाहाल उनलाई पछ्याइरहेकी थिइन् ।
सोहीक्रममा अकस्मात मतपत्र च्यातियो । जे होस् मतगणना पुनः गराउने रणनीतिका साथ योजनाबद्ध तरिकाले त्यो कार्य भएको थियो भन्ने कुरा सर्बत्र छायो । जनताले त्यो घटनालाई त्यसरी नै बुझे । पछि अदालतको आदेशअनुसार पुनः मतदान भयो र माओबादी केन्द्रकी उम्मेदवार रेणु दाहाल विजय पनि भइन् । जुन उद्देश्यका साथ मतपत्र च्यातियो सोही त्यो पूरा पनि भयो भरतपुरमा ।
त्यसबीचमा पुनः मतगणना र पुनः मतदान भन्ने विषयमा पनि ठूलै विवाद भयो । अन्त्यमा अदालतले त्यो विवादलाई अदालतले सल्ट्यायो । तर, पनि असन्तुष्ट पक्षले अदालतको फैसलालाई सम्मान गरे, प्रवृत्तिको भने विरोध गरिरहे ।
दुई उम्मेदवारबीचको कडा परिस्थितिले नै यहाँ यो परिस्थिति निम्त्याएको थियो । कडा प्रतिस्पर्धा हुने ठाउँहरुमा यस्ता खाले गतिविधि निम्तिन सक्ने खतरा बढी मात्रामा हुने गर्छ ।
यो प्रवृति प्रदेश असाेज २ गते हुने पर्देश नम्बर २ मा हुने निर्बाचनमा पनि नदोहिरिएला भन्न सकिँदैन । उम्मेदवारहरुबीच निकै प्रतिस्पर्धा भएका क्षेत्रमा बुथ कब्जा हुने खतरा छ । सुरक्षा निकालयलाई पनि बुथ कब्जा नै प्रमुख चुनौतीको विषय बनेको छ ।
राष्ट्रिय अनुसन्धान विभागले प्रदेश नम्बर २ मा बुथ कब्जा नै प्रमुख चुनौती रहेको जनाइएसकेको छ । विभागले कतिपय स्थानमा बुथ कब्जा गर्ने तयारी भइरहेको समेत गृहमन्त्रालयलाई सूचना दिएको जनाइएको छ ।
सोही सूचनाअनुसार गृहमन्त्रालयले पनि सुरक्षा निकायलाई ‘अलर्ट’मा राखेको जनाएको छ । गृहमन्त्रालयको निर्देशनअनुसार प्रहरीले पनि मतपत्र च्यात्ने तथा बुथ कब्जा रोक्न विशेष रणनीति बनाएको छ ।
प्रदेश नम्बर दुईमा तीन ठूला दल र मधेश केन्द्रीद दलहरुको कडा प्रतिस्पर्धा हुने अनुमान गरिएको छ। कतिपय स्थानीय तहमा थोरै मत अन्तरले हारजित हुने अड्कल काटिएको छ । त्यस्ता ठाउँमा केही मतले हार्ने निश्चित भएपछि फेरि मतदान गराउने रणनीतिअनुसार केही पक्षले योजनाबद्ध रूपमा नै मतपत्र च्यात्न सक्ने जोखिम छ ।
भरतपुर प्रकरणका क्रममा मुख्य निर्वाचन अधिकारीलगायतका कर्मचारीमाथि पनि मतपत्र च्यात्न सहयोग गरेको आरोप लागेको थियो । त्यस्तै, प्रदेश नम्बर २ को निर्वाचनमा पनि निर्वाचनमा खटिने कर्मचारी र मतदानस्थल र मतगणनास्थलमा खटिने प्रहरीमाथि पनि निगरानी गर्नुपर्ने बेला आएको छ ।
प्रकाशित मिति: ३१ भाद्र २०७४, शनिबार