‘आफ्नो कर्मको प्रारब्ध फल यही जुनीमै भोग्नुपर्नेछ, अर्को जुनीसम्म प्रतीक्षा गर्नैैपर्दैन’



कुसुम भट्टराई ओशोको ‘भगवद् गीताका मनोविज्ञान’ पढिरहेको थिएँ ।

‘पूर्वजन्मको सञ्चित कर्मको फल नै आज हामी भोगिरहेका छौँ, आज जे-जस्तो कर्म गर्छौं त्यसको फल अर्को जुनीमा भोग्नुपर्नेछ’ भन्ने दर्शन छ ।

यद्यपि, ओशो भन्नुहुन्छ, ‘यो जुनीमा गरेका कर्महरुको फल अर्को जुनीमै भोग्नुपर्छ भन्ने छैन, यही जुनीमा पनि हामी भोगीरहेका हुन्छौँ । हाम्रो वर्तमान यही जुनीकै भूतको परिणाम हो । हामी जे जस्तो छौँ, हामीले यही जुनीमै आफ्नै कर्मले आफैलाई निर्माण गरेका हौँ । हाम्रो दुःख सुखमा हाम्रो आफ्नै कर्म जिम्मेवार छ । हामी आफै आफ्नो शत्रु र मित्र दुवै हौँ।’

प्रचण्डको सुरक्षा थ्रेट बढ्न थालेछ । ‘महान बलीदानी क्रान्ति’का नायकलाई दुईजना डिएसपीको कमाण्डमा ५९ जना सुरक्षाकर्मी परिचालित गर्नुपर्ने भएछ । राम्रो कर्म गरेको भए यसरी ‘सुरक्षा थ्रेट’को आतंकीत र भयाक्रान्त जीवन बाँच्नु पर्दैनथ्यो होला । ओशोले भनेझैँ, प्रचण्डको आजको भयाक्रान्त जीवन उनको यही जुनीकै कर्मको प्रारब्ध हो ।

सत्यको पक्षमा लडेर के गर्ने ? एकजना युधिष्ठिरबाहेक बाँकी सबै पाण्डव नर्कमा जाकिए । युद्ध सत्यको पक्षमा थियो होला, योद्धाहरुले आफ्नो कर्मअनुसारको फल पाए । अर्जुनले सिखण्डीमार्फत भीष्मलाई छल गरेर मारेकै हुन् । भीमले कृष्णको इशारामा कम्मरभन्दा मुनि गदा प्रहार गरेर दुर्योधनलाई कपटपूर्वक मारेकै हुन् । ‘अश्वस्थामा हतोहत’ भन्दै झुक्याएर दोर्णलाई मारिएकै हो । यस्ता सारा कपटपूर्ण कर्मको फल पाण्डवहरुले पाए ।

प्रचण्डको आजको भयाक्रान्त जीवन उनको यही जुनीकै कर्मको प्रारब्ध हो ।
आखिर महाभारत युद्धका सारा कपटका सुत्रधार भनौँ या नायक भगवान श्रीकृष्णको समेत यदुवंश सखाप भयो र पुरै द्वारिका राज्य समुद्रमा विलीन भयो । कृष्णले सामान्य ब्याधाको बाण लागेर मर्नुपरेको कथा छ ।

प्रारब्धको यो खेल प्रचण्डका हकमा पनि लागू नहुने भन्ने कुरै छैन । उनले आफ्नो कर्मको फल अवश्य पाउने नै छन् ।

उदाहरणका लागि, भियतनामको क्रान्तिपछि पनि होचिमिन्ह टायरको चप्पल लगाएर जनताको माझमा निस्फिक्री हिँड्थे । उनलाई सुरक्षाको कुनै चिन्ता थिएन । कमरेड माओ फाटेकै कोटमा जनताको माझमा हिँड्थे, जतिबेला चिनमा उनको तस्बिर अंकीत नोटको प्रकाशन भइसकेको थियो । नेपालमा सादगीपूर्ण जीवन बिताउने किसुनजी, गणेशमानजीलाई सुरक्षाको खासै प्रबन्ध गर्नुपरेन, तर सौखीन गिरिजालाई सुरक्षा थ्रेट भयो । पुष्पलाल, मनमोहनलाई खासै सुरक्षा थ्रेट थिएन, तर प्रचण्डलाई थ्रेट भयो।

ओशोको भनाई मननयोग्य छ, ‘हामीले आफ्नो कर्मको प्रारब्ध फल यही जुनीमै भोग्नुपर्नेछ, अर्को जुनीसम्म प्रतीक्षा गर्नैैपर्दैन ।’

(सामाजिक सञ्जालबाट)

प्रतिक्रिया दिनुहोस्

 

सामजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल इमेलः [email protected]
फोन : ०१-४१०७६६६
           
प्रकाशक / सम्पादक :ध्रुव सुवेदी
     
           
facebook
© 2019 Deshko News