त्याे सुसाइरहने सल्लाघारी क्षणभरमै यसरी सखाप भयाे (फाेटाे फिचरसहित)
![](https://www.deshkonews.com/wp-content/uploads/2016/04/aago-7.jpg)
भोजपुर, बैशाख १७
भोजपुर सदरमुकाम नजिकै रहेको सामुदायिक बनमा आगलागी हुँदा तीन घर जलेर नष्ट भएका छन् भने करिब २१ लख बराबरको क्षति भएको छ । शुक्रबार दिउँसो करिब साढे दुई बजे भोजपुर नगरपालिका ९ र १० टक्सारमा रहेको तीनधारे सल्लेरी सामुदायिक बनमा अचानक आगलागी हुँदा नगरपालिका १० का मनकुमार श्रेष्ठ, चन्द्रबहादुर श्रेष्ठ र जगतबहादुर श्रेष्ठको घर जलेर नष्ट भएको हो ।
आगलागीले मनकुमार श्रेष्ठको सबैभन्दा बढी धनमाल नष्ट भएको छ । प्रहरीको प्रारम्भिक तंथ्यांक अनुसार धनबहादुरको अन्नपात, गरगहना, लत्ताकपडा गरी करिब १४ लाख ७७ हजार बढीको क्षति भएको छ । त्यस्तै चन्द्रबहादुर श्रेष्ठको दुई लाख ५० हजार आगलागीले क्षति भएको छ ।
जगतबहादुर श्रेष्ठको घरमा बस्दै आएका केशव श्रेष्ठ र ओम नारायण श्रेष्ठको चार लाख बराबरको धनमाल जलेर नष्ट भएको प्रहरीको भनाई छ । उनिहरुको कुखुरा फर्ममा चार सय बढी कुखुरा जलेर नष्ट भएको हो । हावाहुरीकाबिच लागेको आगो सुरक्षाकर्मी र स्थानीयवासीको सक्रियतामा चाँडै नियन्त्रणमा आएको हो । टक्सार बजारको सिरानमा रहेको र भोजपुर सदरमुकामको पुछारमा रहेको सल्लाघारी जंगलमा आगलागी हुँदा स्थानीयवासी त्रसित बनेका थिए ।
आगो नियन्त्रणका लागि नेपाली सेना, नेपाल प्रहरी, शसस्त्र प्रहरी, नगरपालिकाको बारुणयन्त्र र स्थानीयवासीको सक्रियताले समयमै नियन्त्रणमा लिन सकेको शसस्त्र प्रहरी बल टक्सार गुल्मको डिएसपी रामजंग पाण्डेले बताए । आगलागीबाट भोजपुर बजार ठुलो क्षति हुनबाट जोगिएको छ ।
प्रकाशित मिति: १७ बैशाख २०७३, शुक्रबार