मोबाइल फोन निर्माणमा विश्वकै दोस्रो ठूलो देश भारत
काठमाडौं, भदौ १ । भारत विश्वमा सबैभन्दा धेरै मोबाइल फोन उत्पादन दोस्रो ठूलो देश बनेको छ ।
काउन्टरप्वाइन्ट रिसर्चको रिपोर्ट अनुसार सन् २०१४ देखि २०२२ को अवधिमा भारतमा २ अर्ब गोटा भन्दा धेरै मोबाइल फोन उत्पादन भएका छन् ।
तथ्यांक अनुसार उक्त अवधिमा भारतको मोबाइल फोन उत्पादनको वार्षिक मिश्रित वृद्धिदर २३ प्रतिशतले वृद्धि भएको छ ।
भारत सरकारको मेक इन इण्डिया अभियान अन्तरगत स्थानीय उत्पादकहरुलाई दिइने प्रोत्साहन लगायतका कार्याक्रमका कारण मोबाइल उत्पादन वृद्धि भएको बताइएको छ । साथै भारतको आन्तरिक बजारमा मोबाइल फोनको उच्च माग पनि छ ।
तथ्यांक अनुसार सन् २०१४ मा भारतको आन्तरिक बजारमा बिक्री हुने मोबाइल फोनमध्ये केवल १९ प्रतिशत मात्रै स्वदेशमा उत्पादन हुने गरेकोमा सन् २०२२ मा त्यस्तो संख्या ९८ प्रतिशत पुगेको छ ।
त्यस्तै मोबाइल फोन उद्योगमा स्थानीय मूल्य अभिवृद्धि सन् २०१४ को एक अंकबाट हाल १५ प्रतिशतमा पुगेको छ ।
स्मरण रहोस् विश्वमा सर्वाधिक मोबाइल फोन उत्पादन गर्ने मुलुक चीन हो । विश्वमा उत्पादन हुने मोबाइल फोनमध्ये ६७ प्रतिशत चीनमा उत्पादन हुने गर्दछन् भने भारतमा १६ प्रतिशत फोन उत्पादन हुुन्छन् ।
त्यस्तै तेस्रो स्थाानमा भियतनाम पर्छ । यहाँबाट १० प्रतिशत फोन उत्पादन हुन्छ । –एजेन्सी
प्रकाशित मिति: १ भाद्र २०८०, शुक्रबार
