चितवन, पुस ८

चितवनमा ३ हजार भन्दा बढी भूकम्प पीडित थपिएका छन् । हालै सुरु भएको भूकम्प पीडितको पुन लगत संकलनका क्रममा ३ हजार ३ जना भुकम्प पीडितको निवेदन थपिएको हो ।

सामान्य क्षति सहित गरी यसअघि चितवनमा १५ हजार ७ सय ४९ भूकम्प पीडितको तथ्यांक आएको थियो। त्यसमा पूर्ण क्षति भएका घरको संख्या ३ हजार ७ सय २५ रहेको थियो।

तर, अहिले भुकम्प पीडितहरुको निवेदन थपिएको छ।  चितवनका स्थानीय विकास अधिकारी तथा जिल्ला विपद व्यवस्थापन समितिका सदस्य सचिव श्रवणकुमार पोखरेलले गाउँगाउँमा नगरपालिका र गाविसमार्फत गरिएको पुनलगत संकलनको क्रममा भुकम्प पीडितले क्षतीको विवरण पेश गरेको जानकारी दिए।

विवरणको इन्जिनियर सहितको टोलीले घरघरमै पुगेर पुन मुल्यांकन गर्ने र भूकम्प पीडित हो की होइन भनेर पहिचान गर्ने जिल्ला तथ्यांक कार्यालय चितवनका प्रमुख तथा विवरण संकलन कार्यक्रमका संयोजक जीवनाथ आचार्यले बताए।