काठमाडौँ, पुस १८

काठमाडौंमा यस वर्षकै बढी चिसो भएको छ । तापक्रमको पारो आरोलो लाग्ने क्रममा आज न्यूनतम ३ डिग्रीमा झरेको हो । जम्मु काश्मिर हुँदै भूमध्य सागरबाट आएको पश्चिमी वायुको प्रभावका कारण देशभर चिसो बढेको मौसम विज्ञान विभागले जनाएको छ । चिसो बढ्ने क्रम आज पनि रहने विभागले जनाएको छ ।

पश्चिम र पूर्वी पहाडी जिल्लामा हल्का वर्षासँगै हिमपातको सम्भावना रहेको मौसम पूर्वानुमान महाशाखाले जनाएको छ । शनिबार र आइतबारको हिमपातका कारण पहाड र हिमाली क्षेत्रको जनजीवन निकै प्रभावित भएको छ । रसुवा, मनाङ, मुस्ताङ, गोर्खा, दोलखा, ताप्लेजुङ, धादिङलगायत जिल्लाको हिमाली क्षेत्रमा हिमपातका साथै असिना पानी परेको छ ।