ओखलढुंगा जाँदै गरेको बस धुलिखेलको सडमै पल्टियो, १७ जना घाइते
काभ्रेपलाञ्चोक । काठमाडौंबाट रामेछाप हुँदै ओखलढुंगा जाँदै गरेको बस धुलिखेलमा दुर्घटना भएको छ ।
धुलिखेल नगरपालिका–१० सारदा बतासेस्थित बीपी राजमार्गमा बस दुर्घटना भएको हो । दुर्घटनामा १७ जना घाइते भएका छन् ।
बागमती प्रदेश–३–०१–००५ ख ९९४२ नम्बरको बस आज बिहान अनियन्त्रित भई सडकको नालीमा पल्टिएर दुर्घटना भएको जिल्ला प्रहरी कार्यालय काभ्रेले जनाएको छ ।
दुर्घटनामा घाइते हुनेमा बस चालक र सह–चालक सहित १७ जना रहेको प्रहरीले जनाएको छ । बसमा २४ जना सवार थिए ।
घाइतेहरूलाई उपचारको लागि धुलिखेल अस्पतालमा पठाइएको छ । चालक र सह–चालकको टाउकोमा गम्भीर चोट छ । ।
बस घटनास्थलमै रहेकोले राजमार्ग एकतर्फी मात्रै सञ्चालन भएको छ ।
बस रामेछापको धोबी, ढाडे हुँदै ओखलढुंगाको पोकलीका लागि गुडेको प्रहरीले जनाएको छ ।
प्रकाशित मिति: १३ फाल्गुन २०८१, मंगलबार
