प्रहरीले भन्यो–दुर्गा प्रसाईंका र उनका बडिगार्ड पक्राउ परिसके, साढे ११ बजेको फ्लाइटमा काठमाडौं ल्याईंदैछ
काठमाडौं । प्रहरी मुख्यालयले चैत १५ गते काठमाडौंको तीनकुनेमा भएको हिंसात्मक प्रदर्शनका कमाण्डर दुर्गा प्रसाई र उनका अंगरक्षक दिपक खड्कालाई पक्राउ गरेको जनाएको छ ।
प्रसाईंलाई हिजै छिमेकी मुलुक भारतबाट पक्राउ गरिएको भनिएपनि हेडक्वार्टले भने प्रसाईं आज झापाबाट पक्राउ परेको भन्दै विज्ञप्ति जारी गरेको छ ।
हेडक्वार्टरले एक विज्ञप्ति जारी गरी प्रसाईं र उनका अंगरक्षक खड्कालाई भद्रपुरबाट नियन्त्रणमा लिइएको जनाउँदै आवश्यक अनुसन्धानका लागि काठमाडौं ल्याइँदै गरेको जनाएको छ ।
उनीहरुलाई झापाको चन्द्रगढी विमानस्थलबाट साढे ११ बजेको बुद्ध एअरको फ्लाइटमार्फत काठमाडौं ल्याइने बताइएको छ ।
प्रसाईंलाई पक्राउ गर्न नेपाल प्रहरीको विशेष ब्यूरो, काठमाडौं उपत्यका अपराध अनुसन्धान कार्यालयको टोली भारत पुगेको थियो ।
प्रसाईं भारतको आसाम राज्यमा बिहीबार फेला परेका थिए । तर, प्रहरी हेडक्वार्टरले भने हिजो एक विज्ञप्ति जारी गरी प्रसाईं पक्राउ नपरेको जनाएको थियो । तर, आजको विज्ञप्तिमा भने झापाबाट पक्राउ परेको उल्लेख छ ।
यता प्रसाईंको सचिवालयले भने हिजै आसाम प्रहरीमा उनी आफैंले आत्मसमर्पण गरेको दाबी गरेको छ ।
१५ चैतमा तीनकुनेमा भएको राजावादी आन्दोलनका उनी मुख्य कमाण्डर हुन् । उनकै नेतृत्वमा भएको हिंसात्मक प्रदर्शनमा दुई जनाको ज्यान गएको थियो । प्रसाईं भने फरार हुँदै भारत पुगेका थिए ।
प्रकाशित मिति: २८ चैत्र २०८१, शुक्रबार
