एमाले अछाम अधिवेशन : उपसचिव पदका लागि बुद्धिरामको उम्मेदवारी घोषणा
अछाम । नेकपा एमाले अछामका नेता बुद्धिराम साउँदले जिल्ला उपसचिव पदका लागि आफ्नो उम्मेदवारी घोषणा गरेका छन् ।
गत शनिबार मंगलसेनमा उद्घाटन गरिएको ९औं जिल्ला अधिवेशनले पार्टीको नयाँ नेतृत्व चयन गर्दैछ । सर्वसम्मत नेतृत्व चयन गर्न नेताहरु गृहकार्य गरिरहेका छन् ।
सोही बेला नेता साउँदले जिल्ला उपसचिव पदका लागि आफ्नो उम्मेदवारी घोषणा गरेका हुन् । पार्टीलाई संगठनात्मक रूपमा बलियो बनाउन र स्थानीय स्तरमा एमालेको प्रभाव बढाउन आफूले उम्मेदवारी दिएको उनी बताउँछन् ।
उनले पार्टी भित्रको एकता र अनुशासनलाई प्राथमिकतामा राखेर काम गर्ने प्रतिबद्धता पनि जनाएका छन् । उनी यसअघिका जिल्ला कमिटी सदस्य समेत हुन् ।
उपसचिव पदमा पनि आकांक्षीहरु बढेका छन् । नेता साउँदको उम्मेदवारीसँगै जिल्लामा नेतृत्व चयनको प्रतिस्पर्धा थप रोचक बन्ने अनुमान गरिएको छ ।
यसअघि विभिन्न व्यक्तिहरुले उपसचिव पदमा उम्मेदवारी घोषणा गरिसकेका छन् । उता अध्यक्ष पदका लागि पनि सात जनाको अडान कायमै छ ।
नेताहरु सर्वसम्मतिमार्फत नयाँ नेतृत्व टुंगो लगाउने कसरतमा छन् । यदि आज सहमति जुट्न नसके निर्वाचन प्रक्रिया अघि बढाउने तयारी गरिएको छ ।
प्रकाशित मिति: १५ बैशाख २०८२, सोमबार
