बीए तेस्रो वर्षको परीक्षा दिंदै रचना, भन्छिन्–सोचेजस्तो तयारी पूरा गर्न नसकेपनि राम्रो गर्ने प्रयास गर्नेछु
काठमाडौं । गायिका रचना रिमाल बुधबारदेखि सुरु भएको स्नातक तह तेस्रो वर्षको वार्षिक परीक्षामा सहभागी भएकी छन् ।
रत्नराज्य लक्ष्मी क्याम्पसकी विद्यार्थी रहेकी रचनाले परीक्षामा भाग लिएकी हुन् । आन्द्राको संक्रमण भएपछि उनले केही दिन ह्याम्स अस्पतालमा भर्ना भएर उपचार गरेकी थिइन् ।
शनिबार डिस्चार्ज भएकी उनले घरमै स्वास्थ्य लाभ गरिरहेकी छन् । यस क्रममा उनी परीक्षा दिन परीक्षा केन्द्रमा पुगेकी हुन् ।
स्वास्थ्य समस्याले सोचेअनुसार तयारी गर्न नसकेको रचना आफैले सामाजिक सञ्जालफेसबुकमार्फत बताएकी छन् ।
उनले फेसबुकमा लेखेकी छन्–‘बीए तेस्रो वर्षको वार्षिक परिक्षा आजबाट सुरु भएको छ । स्वास्थ्यको समस्याले सोचेजस्तो तयारी पूरा गर्न नसकेपनि सकेको राम्रो गर्ने प्रयास गर्नेछु ।’
गतसाता सांगीतिक प्रस्तुति दिन रुकुम पश्चिम जाने क्रममा उनी बिरामी परेकी थिइन् । त्यसपछि सेनाको हेलिकोप्टरबाट उद्वार गरेर रचनालाई नेपालगञ्ज हुँदै काठमाडौं ल्याइएको थियो ।
रचनाले सांगीतिक करिअर र औपचारिक अध्ययन दुवैलाई एकसाथ अघि बढाइरहेकी छन् । प्रशंसकले पनि उनको हिम्मत र लगनशीलताको प्रशंसा गरेका छन् ।
प्रकाशित मिति: ४ असार २०८२, बुधबार
