मधेशमा खानेपानीको हाहाकार : असारको अन्तिम दिन आज वारुणयन्त्रमार्फत पानी बाँडियो
जनकपुरधाम । आज असार महिनाको अन्तिम दिन अर्थात असार ३२ गते । असार महिना भनेको वर्षात हुने हुने महिना हो ।
बैशाख अन्तिम दिन अर्थात ३१ गते जल तथा मौसम विज्ञान विभागले यो वर्षको मनसुनमा सरदरभन्दा बढी वर्षा हुने सम्भावना रहेको जनाएको थियो ।
यसपालिको मनसुन पनि सरदरभन्दा १५ दिन अगावै भित्रिएको थियो ।
विभागले जेठ १६ गते बुलेटिन जारी गर्दै १५ गते रातिबाटै नेपालको पूर्वी भागबाट मनसुन प्रवेश गरी कोशी प्रदेशको अधिकांश क्षेत्रमा विस्तार भइसकेको उल्लेख गरेको थियो ।
नेपालमा मनसुन भित्रने सरदर मिति जुन १३ अर्थात् जेठ ३० गते हो। सरदरभन्दा १५ दिन अघि नै मनसुन भित्रिएको विभागको भनाइ थियो ।
तर, यसै वर्ष तराईका जिल्लाहरुमा रोपाईं गर्ने त परै जाओस् खानेपानीको समेत हाहाकार मच्चिएको छ ।
वीरगञ्जलगायतका विभिन्न क्षेत्रमा देखिएको खानेपानी संकट समाधानका लागि मधेश प्रदेश सरकारले वारुणयन्त्र नै परिचालन गरेको छ ।
बुधबार बिहान मुख्यमन्त्री सतिशकुमार सिंहले ८ वटा वारुणयन्त्र प्रभावित क्षेत्रमा पठाउँदै सरकार नागरिकको समस्या समाधानमा समर्पित रहेको बताएका छन् ।
प्रदेश विपद् व्यवस्थापन कार्यकारी समितिको निर्णयअनुसार प्रदेश सरकारसँग रहेका ८ वटा वारुणयन्त्रहरू अति प्रभावित क्षेत्रमा पठाइएको हो ।
प्रत्येक वारुणयन्त्रले ५ हजार लिटर क्षमताका दरले एकै पटकमा ४० हजार लिटर खानेपानी आपूर्ति गर्ने जनाएको छ ।
वारुणयन्त्रहरू २४ घण्टा सञ्चालनमा रहने र त्यसको व्यवस्थापन प्रदेश सरकारले गर्ने छन् भने सञ्चालन नेपाली सेनाले गर्नेछ ।
यसअघि प्रदेश सरकारले वन कार्यालयका तीन वटा ट्याङ्कर मार्फत पनि प्रभावित क्षेत्रमा पानी आपूर्ति गरिरहेका छन् ।
त्यस्तै, नेपाली सेनाबाट थप ७ वटा ट्याङ्कर एउटा वारुणयन्त्र समेत पठाउने तयारी भइरहेको जनाइएको छ।
‘पानी वितरणबारे जानकारी गराउँदै मुख्यमन्त्री सिंहले भनेका छन्–‘सुक्खा र खानेपानी संकटका कारण पिडित नागरिकसँग प्रदेश सरकार साथमा छ । संघीय सरकार, स्थानीय सरकार र दातृ निकायहरूसँग समन्वय गरी साधनस्रोतको अधिकतम प्रयोग गरेर समस्या समाधान गर्ने प्रयासमा छौं ।’
खानेपानी संकटले प्रभावित नागरिकलाई राहत दिने उद्देश्यले प्रदेश सरकारले सबै संयन्त्र र स्रोत परिचालन गरेको जनाएको छ ।
लामो समयदेखि वर्षा नहुँदा मधेशमा किसानहरूलाई धान रोप्न समस्या भएको छ । अत्यधिक गर्मीले जनजीवनसमेत प्रभावित भएको छ ।
पानी नपर्दा मधेशको कृषि प्रणालीमा समेत प्रतिकूल असर परेको छ । आकाशे पानीमा निर्भर खेती प्रणाली भएकाले खेत सुक्खा भएका छन् ।
पानीको सतह घटेका कारण चापाकल सुकेका छन्, जसले गर्दा खानेपानीको आपूर्तिमा समेत समस्या पैदा भएको छ ।
प्रकाशित मिति: ३२ असार २०८२, बुधबार
