चक्रे मिलन समूहको गाडीमा खुकुरी र रड भेटियो
काठमाडौं । राजधानीको बाँसबारीस्थित होटल साम्बालामा बिहीबार पक्राउ परेको ‘चक्रे मिलन’ समूहको गाडीबाट दुई थान खुकुरी बरामद गरिएको छ ।
काठमाडौं उपत्यका अपराध अनुसन्धान कार्यालय र जिल्ला प्रहरी परिसर काठमाडौंको संयुक्त टोलीले मिलन गुरुङ उर्फ चक्रे मिलनसहितको समूहलाई शुक्रबार राति पक्राउ गरेको थियो ।
प्रहरीले उक्त समूह सवार गाडीबाट २ थान खुकुरी र केही रड समेत बरामद गरेको हो । बरामद हतियारहरू आफूहरूको सुरक्षाका लागि राखिएको समूहका सदस्यहरूले दाबी गरेको प्रहरीले जनाएको छ ।
पछिल्लो समय चक्रे मिलन स्कर्टिङमा प्रयोग गरिएको गाडीहरूको भिडिओ सामाजिक सञ्जालमा सार्वजनिक भएपछि प्रहरी सतर्क भएको थियो । भिडिओमा बाटो अवरुद्ध गर्दै चक्रेलाई अगाडि–पछाडि सवारी साधनले सुरक्षा दिइएको देखिएको थियो।
हाल पक्राउ परेका सबैलाई जिल्ला प्रहरी परिसर काठमाडौंको हिरासतमा राखिएको छ । घटनासम्बन्धी थप अनुसन्धान भइरहेको प्रहरीले जनाएको छ।
प्रकाशित मिति: १६ श्रावण २०८२, शुक्रबार
