काठमाडौं महानगरले गर्यो पानीको जारको अनुगमन, एक हप्तामै २७१ जार नष्ट
काठमाडौं। काठमाडौं महानगरपालिकाले प्रशोधित पिउने पानीको जारहरूमाथिको अनुगमनलाई तीव्रता दिएको छ ।
बर्खायाममा पानीजन्य रोगहरूको जोखिम बढ्ने हुनाले न्यूनीकरण गर्न महानगरले प्रशोधित पिउने पानीको अनुगमनलाई तीव्रता दिएको हो ।
पछिल्लो एक हप्ताको अवधिमा मात्रै महानगरले विभिन्न क्षेत्रहरूबाट मापदण्ड विपरीतका २७१ वटा जार बरामद गरी नष्ट गरिएको महानगर प्रहरी बलले जनाएको छ ।
यस्तै असार र साउन महिनामा मात्रै १३९ वटा गाडीको जाँच गर्दा ४५६ वटा फोहोर, कुच्चिएका र मापदण्ड नपुगेका जारहरू बरामद गरी नष्ट गरिएको महानगरले जनाएको छ ।
चालु आर्थिक वर्ष सुरु भएयता महानगरले महानगरपालिकाले बल्खु, चाबहिल–चुच्चेपाटी, माछापोखरी–बालाजु, कोटेश्वर लगायतका स्थानमा अनुगमन गरेको कृषि तथा पशुपक्षी विभागका प्रमुख नुरनिधि न्यौपानेले बताए ।
अनुगमनका क्रममा महानगरले पानी उत्पादक कम्पनीहरूलाई मापदण्ड विपरीतका जारमा पानी बिक्री नगर्न, जारमा उत्पादन मिति र कम्पनीको स्पष्ट लेबल राख्न, बिल–बिजक साथमा लिएर हिँड्न र पानीको गुणस्तरमा संवेदनशील हुन कडा समेत निर्देशन दिएको छ ।
प्रकाशित मिति: २५ श्रावण २०८२, आइतबार
