मौरिटानियामा डुङ्गा पल्टिँदा कम्तिमा ६९ जनाको मृत्यु, कैयौं बेपत्ता
काठमाडौं । मौरिटानियाको तटमा डुङ्गा पल्टिँदा कम्तिमा ६९ आप्रवासीको मृत्यु भएको छ भने कैयौं बेपत्ता छन् ।
स्पेनको क्यानरी टापुहरूतर्फ जाँदै गरेको काठको डुङ्गाजस्तो देखिने डुङ्गा पल्टिएको हो । मौरिटानियाली तटरक्षकका अनुसार १७ जनाको उद्धार गरिएको छ र बाँकीको खोजी भइरहेको छ ।
दुर्घटना हुनुभन्दा ६ दिनअघि गाम्बियाबाट डुङ्गा निस्किएको थियो । यसमा लगभग १६० जना थिए, जसमध्ये धेरैजसो गाम्बिया र सेनेगलका नागरिक रहेको बीबीसीले जनाएको छ ।
युरोप पुग्ने प्रयास गरिरहेका अफ्रिकी आप्रवासीहरूमाझ एट्लान्टिक महासागर पार गर्ने यो खतरनाक बाटो हो । गत वर्ष, लगभग ४७ हजार मानिसहरू क्यानरी टापुहरूमा पुगेका थिए ।
स्पेनी गैर–सरकारी संस्था क्यामिनाडो फ्रोन्टेरासको अनुमान अनुसार यस अवधिमा युरोप पुग्ने प्रयासमा ९ हजारभन्दा बढी आप्रवासीको मृत्यु भएको छ ।
प्रकाशित मिति: १४ भदौ २०८२, शनिबार
