नम्बर प्लेट बदलेर चलाउँदै गर्दा चोरिएको मोटरसाइकलसहित एक जना पक्राउ

काठमाडौँ । काठमाडौँको तार्केश्वरबाट चोरी भएको मोटरसाइकलसहित एक व्यक्तिलाई ट्राफिक प्रहरीले रंगेहात नियन्त्रणमा लिएको छ। तार्केश्वर नगरपालिकाको लोलाङ हाइटस्थित सडक खण्डबाट केही समयअघि हराएको बा ७९ प ८७४६ नम्बरको ग्रे रङको रेनेगेड मोटरसाइकल खोजतलास गर्ने क्रममा प्रहरीले फेला पारेको हो।

सवारी धनीले आफ्नो मोटरसाइकल हराएको भन्दै दिएको निवेदनका आधारमा विशेष सक्रियता देखाएको काठमाडौँ उपत्यका ट्राफिक प्रहरी कार्यालयको टोलीले मिति २०८३ वैशाख ९ गते साँझ ६ बजेको समयमा उक्त सवारी फेला पारेको थियो।

तार्केश्वर–७ नागपोखरीस्थित सडक खण्डमा चलाइरहेको अवस्थामा फेला परेको उक्त मोटरसाइकलको वास्तविक नम्बर प्लेट परिवर्तन गरी बा ७३ प ९९६० राखी चलाइएको पाइएको छ।

चोरीको मोटरसाइकलसहित पक्राउ परेका व्यक्तिलाई थप अनुसन्धान र आवश्यक कानुनी कारबाहीका लागि प्रहरी वृत्त बालाजु पठाइएको ट्राफिक प्रहरीले जनाएको छ।