एनएमबि बैंकलाई जर्मनीबाट अन्तर्राष्ट्रिय पुरस्कार

काठमाडौँ, ११ वैशाख। नेपालको एनएमबि बैंकले जर्मनीको कमर्ज बैंक एजीबाट प्रतिष्ठित ‘एसटीपी अवार्ड २०२५’ हासिल गरेको छ।

अन्तर्राष्ट्रिय पैसा पठाउने र भुक्तानी गर्ने काममा उत्कृष्ट सेवा दिएबापत यो पुरस्कार दिइएको हो। विश्वभरका थोरै बैंकहरूले मात्र यो सम्मान पाउँछन्, किनकि यो पूर्णरूपमा स्वचालित र झन्झटमुक्त अन्तर्राष्ट्रिय भुक्तानी सेवा दिने बैंकहरूलाई मात्र प्रदान गरिन्छ।

बैंकका प्रमुख कार्यकारी अधिकृत गोविन्द घिमिरेले भने, “हाम्रा ग्राहकहरूका लागि अन्तर्राष्ट्रिय बैंकिङलाई सजिलो बनाउने हाम्रो कोसिसको यो नतिजा हो। हामी छिटो र सुरक्षित सेवा दिन सधैँ तत्पर छौँ।”

यो पुरस्कारले एनएमबि बैंकलाई व्यापार, लगानी र विदेशी वित्तीय कारोबारका लागि एक भरपर्दो बैंकको रूपमा थप मजबुत बनाएको छ। बैंकले हाल देशभर १९८ शाखा, १८४ एटिएम र ९ एक्सटेन्सन काउन्टरमार्फत सेवा दिइरहेको छ।