लिपुलेकबारे सरकारले फेरि भन्यो- नेपालकै भूमि हो भन्नेमा स्पष्ट र प्रतिवद्ध छौँ
काठमाडौं । नेपाल सरकारले लिपुलेक लगायतका सीमा विवादका विषयमा आफ्नो अडान स्पष्ट रहेको जनाएको छ ।
आजको मन्त्रिपरिषद् बैठकपछि सञ्चारकर्मीसँग कुराकानी गर्दै सरकारका प्रवक्ता समेत रहेका शिक्षामन्त्री सस्मित पोखरेलले लिपुलेक हुँदै कैलाश मानसरोवर जाने बाटो पर्ने भूमि नेपालकै हो भन्ने कुरामा सरकार
प्रतिबद्ध रहेको बताएका हुन् ।
सीमा विवादका सम्बन्धमा परराष्ट्र मन्त्रालयले आफ्नो आधिकारिक धारणा सार्वजनिक गरिसकेको बताउँदै उनले भने- जुन सीमाना विवाद भएको छ, त्यो नेपालको भूमि हो भन्ने कुरामा नेपाल सरकार प्रतिबद्ध छ ।परराष्ट्र मन्त्रालयले हिजो आफ्नो नोट जारी गरिसकेको छ ।’
उनले यो विषय अब दुई सरकारबीचको सहकार्य र कूटनीतिक संवादमार्फत निकास निकाल्ने बताएका छन् ।
लिपुलेक पास हुँदै २०२६ जुनदेखि अगस्टसम्म सञ्चालन हुने कैलाश मानसरोवर यात्रा भारतले केही दिन अघि खुल्ला गरेको थियो ।
उक्त विषयमा आपत्ती जनाउँदै परराष्ट्र मन्त्रालयले हिजो मात्रै कूटनीतिक नोट पठाउँदै उक्त भू–भागमा कुनै गतिविधि नगर्न दुवै छिमेकी भारत र चीनलाई आग्रह गरेको थियो । यसैबीच भारतले पनि जवाफ फर्काउँदै मानसरोवर जाने बाटो पुरानै विषय भएको दाबी गरेको छ।
भारतले नेपालका केही भू-भाग सम्बन्धी दाबीहरू ऐतिहासिक तथ्य र प्रमाणमा आधारित नभएको भन्दै त्यस्ता एकतर्फी दाबी अस्वीकार्य रहेको पनि बताएको छ।
मन्त्री पोखरेलले विवादास्पद क्षेत्र नेपालकै भूमि भएको र यसलाई कूटनीतिक माध्यमबाट सुल्झाउन सरकार प्रतिबद्ध रहेको स्पष्ट पारेका छन् ।
प्रकाशित मिति: २१ बैशाख २०८३, सोमबार
