अब बिहे नगरेपनि आमा बन्न पाइने, बन्यो यस्तो कानून
काठमाडौँ, जेठ २
विद्यमान पितृसत्ताको नियन्त्रणविरुद्ध आवाज उठाउँदै आएका महिलाको माग पूरा भएको छ । अब बिहे नगरेपनि महिलाले आमा बन्ने अधिकार पाउने भएका छन् । कान्तिपुरमा खबर छ ।
संसारभरका महिला अधिकारकर्मीले दशकौंदेखि उठाउँदै आएको मुद्दा हो– ‘आफ्नो शरीर, आफ्नै हक’ । विवाह गरेर पनि आफ्नो इच्छाबिना यौनसम्पर्क राखे त्यसलाई बलात्कारै मान्ने कानुन त नेपालमा पनि बनिसकेको छ ।
अब भने पश्चिमा मुलुकमा झैं नेपालमा पनि बच्चा जन्माउन बिहे गर्नैपर्ने कानुनी व्यवस्था हट्ने भएको छ । संविधानको धारा ३८ मा व्यवस्था गरिएको महिलाको प्रजननसम्बन्धी हक प्रचलनमा ल्याउन बन्दै गरेको विधेयकको मस्यौदामा यस्तो व्यवस्था प्रस्ताव गरिएको हो ।
नेपाल कानुन आयोगमा अन्तिम चरणमा पुगेको विधेयकको सुरुवाती मस्यौदा महिलाहरूको परामर्शका आधारमा स्वास्थ्य मन्त्रालयले तयार पारेको हो ।
प्रकाशित मिति: २ जेष्ठ २०७५, बुधबार
