खानीखोलामा खलपात्रको गर्जन
खानीखोला (धादिङ), पुस ११
लायन्स तथा लियो क्लब अफ पिस, खानीखोलाद्वारा सञ्चालित खानीखोला सार्वजनिक पुस्तकालयले चितवनका कवि मुकुन्द खलपात्रको एकल कविता वाचन कार्यक्रम आयोजना गरेको छ ।
अराजक अक्षर समूह चितवनको सहकार्यमा आयोजित सो कार्यक्रममा कवि मुकुन्द खलपात्रले आफ्ना करिब एक दर्जन बढी कविता सुनाएका थिए । उनको नमस्ते सर, मिस हिमाल, जिन्दगी एक कारोबार, क्याण्डीक्रस यथार्थ लगायतका कविता सुनाउँदा दर्शक तथा श्रोता मन्त्रमुग्ध बनेका थिए ।
समाजका विकृति तथा विसंगतिलाई आफ्नो कविताको विषय बनाउन रुचाउने खलपात्रका कवितामा समयको कटु सत्य पाइने असीम हमालले बताए । उनले भने, खलपात्र नयाँ चेतना बोकेका कवि हुन् ।
उनको यो चौथो एकल वाचन कार्यक्रम हो । यसअघि उनले चितवनमा दुई पटक र काठमाडौँमा एक पटक एकल कविता वाचन गरिसकेका छन् ।
प्रकाशित मिति: ११ पुस २०७३, सोमबार
