केपी ओलीको ‘म प्रधानमन्त्री हुँदा’ पुस्तक विमोचनमा कस्ले के भने ?



काठमाडाैं, माघ १४

नेकपा (एमाले)का अध्यक्ष केपी शर्मा ओली प्रधानमन्त्री भएको बेला गरिएका मुख्य सम्बोधनको सङ्गालो ‘म प्रधानमन्त्री हुँदा’ पुस्तकको आज यहाँ लोकार्पण गरिएको छ ।

प्रेस चौतारी नेपालद्वारा आयोजित कार्यक्रममा एमाले अध्यक्ष ओली, एमाले नेता रघुवीर महासेठ, राजनीतिक विश्लेषक श्रीकृष्ण अनिरुद्ध गौतम, दिनेश सत्याल ‘सौरव’ चरण प्रसाईं तथा पत्रकारद्वय कृष्णमुरारी भण्डारी र विजयकुमार पाण्डेले सयुक्तरूपमा उक्त पुस्तकको लोकार्पण गर्नुभयो ।

सो अवसरमा अध्यक्ष ओलीले पुस्तकमा उल्लेख गरिएका कुरा देशको समस्या समाधान गर्न आएको बताउनुभयो ।  उहाँले राष्ट्रियता, लोकतन्त्र, सामाजिक न्याय, समानता, राष्ट्रिय एकता र देशको समृद्धि जस्ता कुरामा आफूले प्रश्न उठाउँदै आएको भन्दै अन्तर्राष्ट्रिय सम्बन्धमा यी कुरा सँगसँगै गाँसिएको उल्लेख गर्नुभयो ।

सार्वभौमसत्ता, स्वाधीनताको प्रश्नसँग मुलुक गाँसिएको उल्लेख गदै अध्यक्ष ओलीले पुस्तकमा आफ्ना अभिव्यक्तिलाई निष्ठापूर्वक व्यक्त गरेको बताउनुभयो ।

एमाले नेता महासेठले पुस्तक भविष्यका पुस्ताका लागि महत्वपूर्ण भएको भन्दै ओलीले प्रधानमन्त्री भएको बेला राष्ट्रिय स्वाभिमानमा कुनै सम्झौता नगरेको बताउनुभयो ।

लेखक सौरवले ओलीले आफ्नो पालामा देशको नेतृत्व कुसल तरिकाले निभाउनु भएको भन्नुभयो ।

पत्रकार पाण्डेले ओलीले नेपालको बारेमा उठाएको मुद्दा कसैले पनि फाल्न नसक्ने बताउँदै अहिलेको परिस्थिति जटिल बनेको हुँदा यसवाट मुलुकको निकास दिइने जिम्मेवारी वहन गर्न ओलीलाई आग्रह गर्नुभयो ।

कृष्णमुरारी भण्डारीले देशलाई सङ्कटको बेला पार लगाएको हुनाले राजनेताको रूपमा ओली परिचित भएको टिप्पणी गर्नुभयो ।

‘‘राजनेता सङ्कटको बेला चिनिन्छ, सङ्कटको परीक्षामा पास भएपपछि राजनेता स्थापित हुन्छ’’ उहाँले भन्नुभयो–‘‘ओली त्यही सङ्टकको बेला स्थापित हुनुभएको राजनेता हुुनुहुन्छ ।’’

लेखक चरण प्रसाईंले २०७४ माघ ७ गतेसम्म ओलीलाई प्रधानमन्त्री दिएको भए परीक्षक नेताको रूपमा चिनिने विचार व्यक्त गर्नुभयो ।

एमाले केन्द्रीय मुख्यालयले प्रकाशन गरेको उक्त पुस्तक विष्णु रिमाल र शार्दुल भट्टराईले सम्पादन गर्नुभएका छन् । पुस्तकमा ओलीले विभिन्न समारोहमा सम्बोधन गर्नुभएका सम्बोधनलाई विभिन्न पाँच अध्यायमा ५४ वटा लेख र एउटा अन्तर्वार्ता समेटिएको छ ।

प्रतिक्रिया दिनुहोस्
           
सामाजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
फोन : ०१-४१०७६६६
           
संस्थापक / प्रधान सम्पादक : ध्रुब सुबेदी
     
           
facebook
© 2022 Deshko News