यसैवर्ष स्वदेश फर्कने शेख हसिनाको घोषणा

नयाँदिल्ली, १४ असार । बङ्गलादेशकी पूर्वप्रधानमन्त्री शेख हसिनाले यसैवर्ष स्वदेश फर्कने घोषणा गरेकी छन्। मानवताविरुद्धको अपराधसम्बन्धी मुद्दामा अनुपस्थितिमै मृत्युदण्डको सजाय सुनाइएपछि उनले यस्तो प्रतिक्रिया दिएकी हुन्।

७८ वर्षीया हसिना विद्यार्थी नेतृत्वको आन्दोलनका कारण सन् २०२४ को अगस्टमा १५ वर्ष लामो शासन अन्त्य भएपछि छिमेकी भारतमा आश्रय लिइरहेकी छन्। त्यसयता उनी सार्वजनिक रूपमा निकै कम देखिएकी छन्। गत जनवरीमा भने उनले नयाँदिल्लीस्थित प्रेस क्लबबाट भिडियोमार्फत सम्बोधन गरेकी थिइन्।

भारतीय टेलिभिजन एनडीटिभीसँगको अन्तर्वार्तामा हसिनाले आफ्नो विरुद्धको फैसला गैरकानुनी, असंवैधानिक र राजनीतिक उद्देश्यले प्रेरित भएको दाबी गरिन्। उनले आफू मृत्युदण्डको सजायबाट नडराउने पनि बताइन्।

“मेरो विरुद्ध धेरै षड्यन्त्र गरिए। तर ती सबैलाई पार गर्दै म जनताको मतबाट पाँच पटक प्रधानमन्त्री निर्वाचित भएँ र देशको विकासका लागि काम गरेँ,” उनले भनिन्।

स्वदेश फर्किनेबारे सोधिएको प्रश्नमा हसिनाले “सबै बाधा र षड्यन्त्रलाई पार गर्दै म यसैवर्ष आफ्नो देश फर्कनेछु,” भन्दै आफ्नो अडान दोहोर्‍याइन्।

गत नोभेम्बरमा ढाकाको एक अदालतले आन्दोलनका क्रममा हिंसा भड्काएको, हत्या गर्न आदेश दिएको तथा अत्याचार रोक्न असफल भएको ठहर गर्दै हसिनालाई अनुपस्थितिमै मृत्युदण्डको सजाय सुनाएको थियो।

यसैबीच, हसिनाको नेतृत्वमा रहेको पूर्वसत्तारुढ अवामी लिगको गतिविधिलाई पनि बङ्गलादेशमा गैरकानुनी घोषणा गरिएको छ।

उता, गत फेब्रुअरीमा बङ्गलादेशमा सम्पन्न निर्वाचनपछि प्रधानमन्त्री तारिक रहमानको नेतृत्वमा नयाँ सरकार गठन भएसँगै भारत–बङ्गलादेश सम्बन्धमा केही सुधार आएको बताइए पनि हसिनाको सुपुर्दगीको विषयमा दुवै देशबीच मतभेद कायमै छ। बङ्गलादेशले भारतसँग हसिनाको सुपुर्दगीको माग निरन्तर दोहोर्‍याउँदै आएको छ।